標籤 多愁善感的雙魚 下的所有文章

2015我既世界大事小回顧

  2015過去喇。呢一年對我黎講係比較心情沈痛又複雜既一年。

首先,上年既年尾因為病,住左一個星期醫院,而家仲要定期覆診同食藥,唔知會唔會根治,但係自己感到有好轉,同埋早發現,唔係到病危就慘喇。希望16年,自己、家人、朋友都唔好有咩大病痛啦。

第二,老婆大人今年轉左一份輪班輪休既工作。初初,我真係替佢同自己好擔心架。因為大人身體一向比較差,輪班工作對體力同精神既要求都嚴格。好彩,佢都冇咩,仲做得好開心,咁就好喇。另外,因為佢要輪班,所以照顧大小魔怪既工作就交左俾我啦,起初,真係好擔心,因為自己本身唔係好識管理自己,所以要教導佢地,我真係舉手投降。 慶幸有外母幫手之外,佢地都算聽話聽教(有陣時啦)。

第三,大魔怪今年脫離小學雞行列,其實我真係好擔心架,唔知派得好唔好,唔知佢適唔適應到,唔知佢同同學相處成點,唔知跟唔跟得上。總之,就有好多擔心,托賴,暫時都未有大問題。

第四,魔怪爺爺離開左我地喇。雖然係有不捨,但係見佢離開,脫離左痛苦,覺得對佢黎講可能係另一種幸福呢! 老頭子,放心啦,我會連你果份都頂埋,好好咁努力落去。

祈望,2016年一切都順利,有小難題就好喇,因為我真好懶呀。

呀,唔記得呢個反斗星小魔怪。 希望佢健健康康就好喇。

#每日逸事 #多愁善感的雙魚

  

廣告